26 сентября, 2023 - 15:32
Жыл сайын айлада Долинскде Малкъар халкъ Ата журтундан зор бла кёчюрюлгенине аталгъан мемориалда Мечиланы Кязимге, Къулийланы Къайсыннга, Алим Кешоковха аталгъан фестивальла бардырыладыла. Анда Нальчикни эм аны тийресинде эллени мектеплеринден устазла, окъуучула келип, башында сагъынылгъан акъылманланы чыгъармаларын окъуп эришедиле.
Ала бошагъандан сора, къауум жаш, къыз малкъар, къабарты, орус, ингилиз, тюрк тилледе жырлайдыла. Сукъланып тынгылайса алагъа, къаллай ариу ауазлары болгъанла бардыла деп. Аланы жырларгъа юйретген а Ирина Лиевады. Аны кесини энчи жыр студиясы барды, Нальчикде Профсоюзланы юйюнде. Ары барып, ишини юсюнден ушакъ этгенме.
Маданият юйге жете келгенлей эшитеме жыр тауушла. Ирина Ордашаовна юйретген къызла жырлай эдиле. Отоуларында жыр жаздыргъан оборудование, музыка инструментле бардыла. Мен баргъанда, юч къыз жырлай тура эдиле. Устазлары уа пианино согъа. Студияны аты – «РиРаДа». Аны магъанасы неди дегенде, бизде Малкъарда орайда дегенчады.
- Жырларгъа юйренирге жыйырма беш адам келеди. Асламысы къызладыла. Сейирлик ауазлары болгъанла бардыла. Алагъа бек къууанама. Алай жырчыгъа ауаздан сора да итиниулюк эмда эрикмей, устазгъа жюрюп, юйренирге керекди. Бир-бирле эки-юч жырны юйреннгенден сора, кеслерин чынтты профессионалла сунуп, жюрюмей къаладыла. Алгъа ауазлары артыкъ сейирлик болмай, алай арымай-талмай бери келип, жырларгъа юйренип тургъанладан аламат жырчыла боладыла, – дейди устаз.
Ол биледи къайсы сабийни ауазы жырны къаллай тюрлюсюне келишгенин. Анга кёре дерс да береди, сёз ючюн, эстрада, опера неда миллет жырла дегенча. Бир-бир атала, анала уа, ол жыр анга керек тюйюлдю, ма бу жырны бер деп, тохтайдыла. Болсада устаз болумну ангылатып, хар бирини фахмусуна кёре юйретеди. Ирина Ордашаовна юйретген жашла, къызла кёп эришиуледе алчы жерлеге тийишли болгъандыла.
Иринаны баш иеси, республикадан тышында да белгили композитор Аслан Лиевди. Была экиси да кёп назмулагъа макъам салгъандыла. Аланы белгили жырчыла айтадыла.
Алгъаракъда Долинскде мемориалда жаш назмучулагъа аталып фестиваль болгъан эди. Аны махкемени таматасы Теммоланы Фаризат къурагъан эди. Анда Ирина юйретген къызла орус тилде «Живи» деген жырны эшитдиргенде, адамла ёрге къобуп тынгылагъандыла. Чыгъарманы сёзлерин Анна Дьяченко жазгъанды, макъамын а Ирина бла Аслан Лиевле салгъандыла.