11 июля, 2023 - 15:40
«Ана тиллерин эмда миллетлерини маданиятларын, адет-тёрелерин билгенле» деген республика даражалы эришиуде хорлагъанланы бла призёрланы эмда аланы юйретген устазланы атлары белгили болгъандыла. Эсигизге салайыкъ, конкурс малкъар, орус, къабарты тилледе бардырылгъанды, анга тогъузунчу-онбиринчи классланы окъуучулары къатышхандыла. Эришиуню мураты уа жаш тёлюню Къабарты-Малкъарда жашагъан халкъланы ана тиллери эмда адет-тёрелери бла шагъырейлендириу эмда аланы сакълау бла байламлы болгъанды.
Нальчик шахарны мектеплерин энчи чертип айтсакъ, анга экинчи номерли лицейни бла онсегизинчи номерли школну келечилери аслам халда къатышхандыла. Алай бла, конкурсну эсеплерине тийишлиликде орус тилден биринчи жерни Лелюкаланы Малика алгъанды. Ол сагъынылгъан лицейни тогъузунчу классын бошай турады. Аны бу предметден Бёзюланы Клара Далхатовна окъутады.
Бу эришиуде экинчи уа Тамирланы Ансоков болгъанды. Ол онсегизинчи школну быйылгъы выпускнигиди. Аны устазы уа Мадина Гумаровна Хацукова къабарты тилден хазырлагъанды.
Экинчи лицейни онунчу классыны окъуучусу Бабаланы Танзиля малкъар тилни ахшы даражада билгенин ачыкълап, конкурсда ючюнчю жерге тийишли болгъанды. Къызчыкъны таучагъа белгили устазыбыз Тёппеланы Ханифа Мустафаевна юйретеди.
Эришиу КъМР-ни Жарыкъландырыу эмда илму министерствосу эмда Т.К. Мальбахов атлы къырал миллет библиотеканы бирикген башламчылыкълары бла къуралгъанды эмда бардырылгъанды.
