12 января, 2022 - 10:36
Узэсэ сэгъейщ
Зыпщ гуэрым пхъу закъуэ иIэти, дыгъэ къепсым нэхърэ нэхъ дахэт, жаIэ. НэгъуэщI зы хэку гуэрми и лIыгъэрэ и хахуагъэкIэ зы пщы щауэ гуэр щыIэти, пщащэм хьэщыкъ хуэхъури, лъыхъуащ. Лъыхъуа щхьэкIэ къыпрагъэхащ - къадакъым. Аргуэру лъыхъуащ, аргуэру къыпрагъэхащ. ИтIани лъыхъуащ, арщхьэкIэ ещанэми къыпрагъэхащ… Пщым апхуэдиз лъыхъур иужэгъури, игу ирилъхьащ пщы щауэм хузэфIэмыкIын пиубыду игъэбэяуну. Псэлъыхъухэр къыщытрагъазэм, пщыжьым яжриIащ:
- Мы щIалэр апхуэдизу щыерыщкIэ, къэлътмакъ зэпедзэкI кърещти, факъырэ Iус къыхихыу илъэсищкIэ хэкур кърекIухь - къыхихыр и Iусу, къыдэхуар ищэрэ дыщэу игъэтIылъу. Апхуэдэурэ илъэсищым дыщэ пщалъищ зэхуихьэсыфмэ, ар си хъыджэбзым и уасэ хъунщ.
Псэлъыхъухэр нэщхъейуэ къэкIуэжри, пщыжьым къажриIар пщы щауэм лъагъэIэсыжащ.
Пщы щауэр хьэщыкъти, цIутI жимыIэу, къэлътмакъ зэпедзэкIыр къищтэщ, хьэмкIутIей башышхуэр иубыдыжри, факъырэ Iус къыхихыу хэкур къикIухьыну ежьащ. Къыхихыр ишхыу, къыдэхуэр ищэрэ дыщэ ищIу илъэсищыр щIэх икIащ. Апхуэдэххэурэ пщы щауэм и дыщэ пщалъищыр иригъэкъуащ.
Пщалъищ ирикъуа щхьэкIэ, илъэсищкIэ факъыра щхьэкIэ, щIалэм къэкIухьын щигъэтакъым: еуэ къуажэ-къуажэр къекIухь, еуэ факъырэ Iус къыхех, еуэ дыщэкIэ зэрегъэкIуэкI. ЩымыувыIэххэм, зы махуэ гуэрым и ныбжьэгъухэр къыпэуващ:
- Уасэ хъун зэхуэпхьэсащ, иджы аргуэру дылъыгъэхъу узытхьэкъуа хъыджэбзым, - жаIэри.
АрщхьэкIэ пщы щауэр хэгупсысыхьащ. Хэгупсысыхьри:
- Хьэуэ, - жиIащ, - илъэсищкIэ факъырэ Iус къыхихыу хэтам дэкIуэн хъыджэбз щыIэкъым. КъыздэкIуэми, и гум сищтэжыну, си псалъэм еувэлIэжыну? Си насыпым сэгъейр текIуащи, мы сызэса IэщIагъэр схуэгъэтIылъыжынукъым, сыфакъырэщи, сыфакъырэщ! - жиIэри ежьэжащ.
Адыгэм зэсэ и щIасэкъым, сэгъейм ухесхьэ, жаIэри. ЩIалэм и щхьэ кърикIуар куэдым щхьэкIуэ ящыхъуащ, гъэсэпэтхыди яхуэхъуащ. ЗэраIуэтэжымкIэ, пщыщауэрзытекIуэдахъыд-жэбзымзырищIэупщIэжакъым.
Бзэ ІэфІ и щІагъ дыщэ щІэлъщ
Зэгуэрым Дизкъуажэ ириджауэ пщыр къытекІиерт.
- ДахэкІэ пхуэзмыщІэр ІейкІэ пхуэсщІэнкъым, пщы, укъыстемыкІиеу дахэкІэ къызжеІэ, «Бзэ ІэфІ и щІагъ дыщэ щІэлъщ» жаІэу псалъэ щыІэщ, ар зыщыгъэгъупщэн хуейкъым, - жриІащ Дизкъуажэ пщым.
- Уи щхьэр къэгъэпцІэж абыкІэ, бзэ ІэфІым зыгуэр къыпыкІыу щытатэмэ, зы джанэ къекІуу пщыгъынт, - къыжриІащ пщым, Дизкъуажэ джанэ лэжьа дыдэ гуэр зэрыщыгъыр къриІуэкІыу.
- АтІэ, а псалъэжьыр зэрыпэжыр уи фІэщ щымыхъукІэ, пщы, уи гуащэ дыдэм мы бзыхьэхуэ тІэкІум джанэ къыхезгъэщІыкІынщ, ар дэрбзэр Іэзэу жаІэри, - жриІащ Дизкъуажэ, и жыпым кърилъэфа бзыхьэхуэ тІэкІур иригъэлъагъури.
- КъыхищІыкІынкъым!
- КъыхищІыкІынщ!
- КъыхищІыкІынкъым!
- КъыхищІыкІынщ, пщы, ауэ уэ гуащэм деж уныщІэмыхьэу ныкъуэплъу щыт.
Арыххэти, щІызэдауэ Іуэхур ящыгъупщэжри, баз зэпихьащ.
Пщым лъэныкъуэ зригъэзри, Дизкъуажэ гуащэм деж щІыхьащ.
- Мыр джанэ схуэщІ, - жиІэри щэкІ бзыхьэхуэ тІэкІур Дизкъуажэ гуащэм иритащ.
- Ана-а, Дизкъуажэ, мыбы джанэ къыхэкІрэ, пщампІапхъэ ирикъункъым! - къыжриІащ гуащэм.
- СщІэркъым, «гуащэр апхуэдизу дэрбзэр Іэзэщи, пщампІэ фІэкІа къызыхэмыкІынум джанэ къыхещІыкІыф» жаІэу псоми къуажэм щагъэхъыбарырти, къэсхьащ, къыщыхэмыкІынукІэ, схьыжынщ, - жриІащ абы Дизкъуажэ.
- Къэгъанэ атІэ бзыхьэхуэ тІэкІур, джанэ къыхэтщІыкІыфмэ деплъынщ, - жиІэри, щытхъум къигъэгуфІа гуащэм бзыхьэхуэр Іихащ икІи къэруакъ джанэ дэгъуэ хуидри, етІуанэ махуэм къритыжащ.
Арати, Дизкъуажэ базыр пщым къыфІихьащ.