13 июня, 2023 - 15:32
Нальчикде искусстволаны 1-чи номерли сабий школундагъы «Иоканто» жыр студиясына жюрюгенлени къаууму Москвада бардырылгъан Grand Prix Maestro фестивалгъа къатышхандыла. Ары Россейни кёп регионларындан «Аrt оpеn world» халкъла аралы фестиваль араны проектлерини финалына чыкъгъанла чакъырылгъандыла. Аланы араларында Къабарты-Малкъардан да бешеулен болгъанды. Ала Пятигорскде, Москвада, Дондагъы-Ростовда бардырылгъан конкурслагъа тири къатышып, къыралыбызны белгили артистлери жырлагъан «Измайлово» концерт залны сахнасына чыгъаргъа эркинлик алгъандыла.
- Сабийле аллай уллу сахнагъа биринчи кере чыкъгъандыла эмда шёндюгю сурамлагъа тийишли аппаратура бла ишлегендиле. Сёзсюз, ала къууаннган да, абызырагъан да этгендиле, - деп белгилегенди искусстволаны сабий школунда «Иоканто» жырчы къауумну башчысы Анна Пазова. – Сабийлени хар бири да ючюшер композицияны кёргюзтгендиле, ол а алай тынч болмагъанды. Биз бек тынгылы сайлайбыз жырланы, нек дегенде жюрини оюмуна къулакъ салып, андан ары къаллай жолну сайласакъ тап боллугъун билебиз.
Бизни жерлешлерибизге жырчы Алёна Галлиардт, халкъла аралы эмда битеуроссей конкурслада атын айтдыргъан Елена Лаврова, «Хар жюрекде да сюймеклик» атлы халкъла аралы кинофестивальны президенти, телевидениеде бериулени бардыргъан Сергей Переверзев да багъа бичгендиле.
– Миллет эмда патриот жырланы айтханыгъыз ючюн бек сау болугъуз, ол сабийлени айнытыугъа эмда тёрелени сакълаугъа бир да болмагъанча магъаналыды, - деп белгилегенди Алена Галлиардт. – Быллай фестивальла хунерликлени кёргюзтюу бла чекленип къалмайдыла, къыралыбызны кёп миллетли халкъларыны адет-тёрелерин, маданиятларын да билирге себеплик этедиле.
Нальчикде искусстволаны сабий школуну келечилери Алёна Анатольевнагъа эмда фестиваль араны башчысы Юрий Соломатиннге бла РФ-ни халкъ артисти, жюрини «Хореография искусство» номинацияда къауумуна кирген Дикалу Музакаевха жоралап музыкалы саугъа да хазырлагъандыла.
Фестивальны эсеплери биз ёхтемленирча болгъандыла. Белла Апанасова, Алим Карданов, Виктор Ким эмда Мурат Шхагапсоев биринчи эмда экинчи даражалы дипломла бла саугъаланнгандыла. Эришиулеге катышханланы араларында бек гитчеге саналгъан тёртжыллыкъ Ева Гугуева уа «Шла Маруся» деген жырны айтханы ючюн гран-при къоллу болгъанды.
Энди жаш жырчыларыбыз жангы конкурслагъа хазырланып башларыкъдыла. Ала уа кёп сакълатырыкъ тюйюлдюле.
