20 октября, 2021 - 11:24
Чочайланы Даутну жашы Заур бийик тау элде Бызынгыда туугъанды эм есгенди. Мында орта школну бошагъандан сора, Нальчикде Кьабарты-Малкъар къырал университетни медицина колледжине окъургъа кирген эди. Алай экинчи курсунда окъуй тургъанлай, Сергей Киров атлы военно-медицина академиягъа окъургъа кетген эди. Аны айырмалы бошап, Чочайланы Заур шендю Подмосковьяда воздушно-десантный войскаланы бригадасыны медицина отрядында гвардияны прапорщигини званиясында къуллукъ этеди.
Военный медицина академияда окъугъан жылларында Чочайланы Заур атын иги бла айтдырып тургъанды. Аны таматасы А.Бельских къол салып, кеп грамотала бла эм дипломла бла саугъаланнганды. Ол санда «Очаг-2016» деген ТСУ-ну бардыргъан заманда болдургъан бийик жетишимлери ючюн. Регионда бардырылгъан «Молодые профессионалы» деген ачыкъ чемпионатда «Медицинский и социальный уход» деген компетенцияда 3-чю жерни алгъаны ючюн, таулу жаш Диплом бла саугъаланнганды. Академияны ич аурууланы пропедевтикасыны кафедрасында ВНОКС илму конференциясына къатышып, «Оценка факторов риска в ранней диагностике сахарного диабета» деген темагъа доклад этгени ючюн да Чочайланы Заур Диплом къоллу болгъанды.
Къарыулу, чырайлы Чочайланы Заур спорт эришиуледен да артха турмагъанды. Сергей Киров атлы военно-медицинский академияны гиря кетюрюу спортдан первенствосуна къатышып, ахшы жетишимле болдуруп, 2-чи жерни алгъанды, грамота бла да саугъаланнганды.
Гвардияны прапорщиги Чочайланы Заур аскер къуллугъуна кертичилиги ючюн, аскер подготовкада болдургъан жетишимлери эм аллына салыннган жумушланы тынгылы тамамлагъаны ючюн да аты махтау бла айтылгъанлай турады. Бызынгычы жаш ахшыланы сатырында баргъаны аны ахлусун-жуугъун,тенглерин, элини адамларын да бек къууандырады.
