22 апреля, 2025 - 09:38
Къайсы халкъны да тамблагъы кюню, ышанмакълыгъы да – ол аны бюгюннгю жаш тёлюсюдю. Къулийланы Милана да бюгюннгю тёлюбюзню келечисиди. Ол туугъан эли Булунгуда мектепни майдалгъа бошап, бусагъатда Нальчикде медицина академияны «Багъыу иш» бёлюмюню бешинчи курсунда билим алады.
Гитчелигинден да юйюрде къарт атасы-ыннасы бла бирге ёсген къызчыкъ хурметге, адет-тёреге да аланы юлгюлеринде юйреннгенди. Билгенибизча, абадан тёлюбюз а, бизни жаланда айтханлары бла угъай, кеслерини ариу къылыкълары бла да юйрете келгенди. Иш юсюнде чыгъыныулукъгъа да энчи эс бургъанды.
Къартланы биргелерине ёсген жаш тёлю башхаракъла болгъанларын къыз да чертеди. Аны алайлыгъы кёзге тууралыгъын айтады.
Кеси уа мектепде гитчелигинден да иги окъугъанды. Баям, алайсыз боллукъ да болмаз эди. Анасы Мадина бюгюнлюкде да элни сабий садында юйретиучюдю, ата эгечи Натифа уа, школда химиядан дерсле бергенинден сора да, кёп жылланы аны директору болуп да тургъанды. «РФ-ни билим бериуюню отличниги» деген даражалы атха да тийишли болгъан эди.
Медицинаны уа Милана сабийлигинден да сюйгенди. Ол да гинжилерине, бирси илляуларына «уколла» этип, ыннасына байлаула салама деп, асламысында алай ойнагъанды.
Муратына жетер ючюн химиядан, биологиядан, орус тилден дерслерине бегирек эс бургъанды. Айхай да, медицина факультетге, бютюнда аны бюджет бёлюмюне кирир ючюн, Бир къырал сынаулада аладан ахшы балла да керек боладыла. Аны умутун толтурур ючюн, ата-анасы анга не тюрлю онгну да тапдырыргъа угъай демегендиле. Булунгудан Нальчикге ыйыкъны ичинде репетиторлагъа юч-тёрт кере элтип тургъандыла. Ол амал кесини хайырын да бергенди. Алай бла мураты толуп, КъМКъУ-ну медицина академиясыны бюджет бёлюмюне тюшгенди.
Белгилегенибизча, бюгюнлюкде Милана бешинчи курсдады. Биринчи студент болгъан ал кезиулеринде окъуяллыкъ болурмамы деп къоркъгъан эсе да, жаланда «бешле» алады. Мектепден университетге олимпиадагъа келген заманында анда окъургъа къалай мурат этгенин да унутмайды. Ол умуту толгъаны ючюн юйдегилеге, устазларына ыразыды.
Медицина жаны бла билим алгъан не заманда да тынч тюйюлдю. Алай эсе да, Къулийланы къызлары жаланда дерслеге жюрюгени бла чекленмей, илму бла кюрешеди. Кесини докладлары бла КъМКъУ-ну мурдорунда къуралгъан халкъла аралы студент илму-практикалы конференциялада сёлешгенлей турады. Аны неврологиядан эмда нейрохирургиядан жазгъан статьялары «Актуальные вопросы медицины» атлы журналда басмаланнгандыла.
Андан тышында да, хунерли къыз биохимиядан кюрешип тургъанды. Бу ыздан кесини устазы бла бирге методикалы пособиялагъа бла дерсликлеге задачала хазырлагъанды. Бюгюнлюкде да преподаватели Мирзоланы Назифатны илму башчылыгъында гистология бла байламлы кюрешеди. Бу темадан жазгъан ишлери уа ВАК-ны тизмесине кирген журналда басмаланнгандыла.
Жашау терк тюрлене, бюгюнлюкде тарихли технологияла да айный баргъан заманда уа, ол медицина академиядан тышында да, IТ-технологияла жаны бла окъургъа киргенди эмда бу жаны бла да жетишимлиди.
Ючюнчю курсха жюрюген заманындан башлаб а, Нальчкде «Радуга» сабий реабилитация арада медсестра болуп да ишлейди. Алай эсе да, окъуууна заран тюшюрмей, белгилегенибизча, жетишимлиди.
Аны бла да чекленмей, КъМКъУ-ну волонтёр арасыны келечисиди. Мектепледе сабийлеге саулукъну юсюнден башха-башха темалагъа лекцияла окъуйду. Поликлиникада врачлагъа къагъыт ишлерин тамамларгъа себеплик этеди.
Къайсы жаш адамныча, аны кёпдюле ахшы муратлары. Специалитетни бошап, хунерли къыз ординатурагъа кирип, не эндокринология, неда гастроэнтерология жаны бла билимин ёсдюрюрге сюеди.
– «Радугада» медсестра болгъанымлы бери усталыкъны тюз сайлагъаныма бютюн къууаннганма. Ишге сюйюп барама, хар нени кёлюм бла этерге кюрешеме. Врач болур ючюн сабийлигимде жаланда жандауурлукъ керек болгъан сунуучу эдим да, энди уа аны бла бирге билим, жууаплылыкъ, сюймеклик, иш кёллюлюк да кереклисин ангылагъанма эмда анга кюн сайын да тюшюннгенлей барама, – дейди кеси уа.
Кертиди, Милананы дерслеринден, ишинден тышында бош заманы артыкъ къалмайды. Болсада ол сурат ишлеуню жаратады да, анга заман бёлмей да болмайды. «Баям, бу хунер атам Ибрагимден, аны къарындашындан кёчген болур. Сурат ишлей, кёлюм кётюрюледи, дуниягъа башха кёзден къарайма», – деп да айтады. Мындан арысында къайда билим алса да, ёз халкъыны ичинде жашаргъа, аны жамауатына болушлугъун бериргеди мураты, аны бла бирге уа илму бла кюреширге да. Кеси жыйышдыргъан сынамны къагъытха тюшюрсе, ол амал аны ызындан келликлеге хайырлы боллугъуна ышана, алгъа таукел къарайды.
Трамланы Зухура.
