27 февраля, 2024 - 15:40
Холам-Бызынгы тары бла ёрге бара, Къара-Суудан эки-юч къырым чакълы ётгенлей, жолну онг жанында бир аламат ариу жер барды. Бийик къаяланы ичинден, аны кёп жерин тешип, ууакъ-ууакъ суучукъла чыгъадыла. Ала барысы да бирге жыйылышып, шыбырдай-шыбырдай хапарлаша, жырлай, бир ызгъа туруп, уллу черек таба чабадыла. Таза суу, сууукъ суу.
Алайтын баргъан, ётген жолоучу, малчы тохтайды, бет-къол жууады, къош ууучу бла бир уртлап, суусабын къандырады. Бираз солугъан да эте, жолуна алай атланады. Бирде уа алайда намаз эте тургъан акъсакъалны кёрюрсе.
Бу аламат жерлеге ёмюрледен бери да таулула Тыжынты дейдиле. Анга алай а къая тешикледен ууакъ суу шорхачыкъла чыкъгъанлары ючюн айтылгъанды. Бери келе тургъан адамла анга Къыз Жилямукъла дейдиле. Кертиси бла да, къаядан саркъгъан суучукъла мудах къызны кёз жашларына ушайдыла.
Ким биледи, алай эсе да? Къая къызыны жилямукълары уа болурламы? Солунг, онгунг чынгыл къаяла, арасы уа – тар жерчик. Эки къая ортасында жаланда Холам череги бла Бызынгы жолу. Къатыракъ сёлешсенг, къая къызы жууабын къайтарады. Аны тауушу къаяла тузагъындан къатлап-къатлап эшитиледи.
Алгъаракъда мен да болдум алайда. Къол-бет да жуудум, ууучум бла алып, суусабымы къандырдым. Къаяла тузагъында тургъан къызны кёз жашларына къарап, кёп сагъыш этдим. Журтубузну тамаша жерлеринден уллу зауукълукъ алып, ызыма жол салдым.
