1 ноября, 2022 - 15:32
Ёмюрледен бери ёсюп келген ариу къылыкълы, адетли, намыслы жаш тёлюге жамауат не заманда да энчи хурмет бергенди. Халкъ ичинде аланы сыйлары бийикде болгъанды. Къайсы атаны, ананы да башын ёрге ёхтем кётюртюрюк – ол аны баласыды.
Чегем шахарны тёртюнчю номерли орта школунда окъугъан Гогуйланы Ислам юйюрюню ёхтем эм чёрчек уланыды. Ол онунчу классха жюрюйдю.
Бизни таулу жашыбыз, суратла ишлеп, алада жерибизни ариулугъун, миллетибизни хазнасын, адамларыбызны жюрек тазалыкъларын кёплеге кёргюзтюп, эс бурдуртады.
Аны саулай мектепни сабийлери таныйдыла десек, ётюрюк болмаз. Нек дегенде ол школ, район, республика даражалада бардырылгъан эришиулеге къатышханлай эм дайым да биринчи жерлеге чыкъгъанлай турады.
Кёп болмай а Къабарты-Малкъар Республиканы Чегем районуну Билим бериу управлениясыны грамотасына тийишли болгъанды. Аны хар этген ишинде, не тюрлю затха узалса да, жерибизни, адамыбызны суратынмы салады, сагъышын, сезиминми билдиреди – хар биринде фахмулукъну къол ызы эсленеди. Ол кесини аламат ишлери бла уллуну-гитчени да сейирсиндиреди, къууандырады.
Аны устазы Лариса Мачуевна окъуучусуну юсюнден былай айтады:
– Ислам бек ариу къылыкълы, тюз акъыллы, бетинден жылыу ургъан, намыслы сабийди. Аны устазла да, окъуучула да бек сюедиле, хурмет да этедиле.
Аны аммасына берген намысын-хатерин къоншулары айтып бошаялмайдыла. Ол къарт анасыны жюрегини ургъаныды, солугъан хауасыды. Бу огъурлу тиширыу туудугъуну юсюнден айтып башласа, ауазы къалтырайды.
Бизни газетибизни юсю бла Гогуйланы Зухура (Исламны аммасы) устазлагъа ыразылыгъын билдиреди, энчи да Хочуланы Лариса Мачуевнагъа:
– Школчулагъа билим алыуну къыстау заманы башланнганды. Аны айтханым, тёртюнчю школну устазларына жюрегимден ыразыма. Андагъы педагогла алгъа итиннген, алчы сынамны, жангы амалланы кенг хайырланнган адамладыла. Аланы ёсюп келген тёлюню миллет адетледе, патриот ниетде юйретиуге аслам эс бургъанларын а бютюнда жаратама. Сабийлеринден, окъуучуларындан къууансынла, хар жангы кюнлери огъурлу атламдан башлансын, – дейди ол.
Ислам а аммасы къуру аны кёллендиргенлей тургъанын, юйюрю анга уллу кюч-къарыу да бергенин белгилейди. Кеси да, онбиринчи классны бошагъандан сора, архитектор болургъа сюеди.
Сайлагъан усталыгъында жетишимли, бирсилеге да юлгюлю болуруна биз да ышанабыз.
