15 июля, 2025 - 09:51
Окъуучула мектеплени бошап, Бир къырал сынауланы берген кезиуде хар заманда да аладан бийик эсеплени сакълай, жетишимли болурларын излейбиз. Бу жол а, биринчиле болуп, бизни Черек районну школларын тауусхан къызчыкъла кёллендиргендиле.
Батчаланы Алина Бабугентни битеулю билим берген мектебинде окъугъанды. Биринчи классдан да аны белгилери «бешледиле». Энди ол кюмюш майдалны аллыгъы да белгилиди.
Алина уа майдалгъа керти да тийишли болгъанын ачыкълагъанды. Ол химиядан – 91 (устазы Къудайланы Фатима Магометовна), орус тилден (устазы Аппайланы Фатима Жамаловна) 81 баллагъа жазгъанды ишлерин. Математиканы мурдорлу тюрлюсюнден а «беш» белгини алгъанды. Биологиядан да 81 баллгъа тамамлагъанды сынау ишин.
Къызчыкъ кеси уа аллай бийик баллары боллукъдула деп сакъламагъанын айтханды. Окъутхан устазларыны барысына да ыразылыгъын билдире, аланы усталыкъ даражаларыны себебинден репетиторлагъа жюрюмегенин, жаланда дерследе айтылгъанны бла Интернетни амалларын хайырланнганыны юсюнден хапарлагъанды.
Мектепде окъугъан кезиуюнде олимпиадалагъа къатыша, айырмалы бола келгенди. Сёз ючюн, 10-чу классда болгъанында, Окъуучуланы битеуроссей дерс олимпиадаларында биологиядан район эмда регион даражалада биринчи жерлени алгъанды. Аны ючюн а устазы Бёзюланы Зухура Мухарбиевнагъа ыразыды.
Ол спорт бла кюреширге да сюеди, волейболгъа жюрюп тургъанды. Дуния суратлау литератураны жаратады. Мураты уа врач болургъады. Кесибизни университетибизде медицина факультетни «Багъыу иш» бёлюмюн сайлагъанды.
Къашхатауну мектебин бошагъанды Чеченланы Амила уа. Аны орус тилден эсеби 91 баллды. Бу дерсден Холамханланы Фатима окъутханды.
Бирси сынауларын айтсакъ, математикадан «беш» алгъанды. Обществознаниядан а ишин 72 баллгъа жазгъанды. Алай бла ол да алтын майдалгъа тийишли болгъанын ачыкълагъанды. Ингилиз тилден эсеплерин а алыкъа сакълап турады.
Амила жетинчи классдан да билгенди кесини билимин тыш къыраллы тилле бла байларыгъын. Аны себепли Къашхатауда Жаш тёлюню чыгъармачылыкъ юйюне къошакъ халда берилген дерслеге жюрюп, анда Мокъаланы Айза Алимовнадан юйренип тургъанды. Артда уа Нальчикге «Лингвист» атлы школгъа жюрюгенди. Алай эсе да, мектепде ингилизчагъа тюшюндюрген устазы Батчаланы Фатима Рамазановнагъа бютюнда ыразыды.
Бу дерсден олимпиадалада айырмалы болгъанлай келгенди. Мектепде «Биринчилени атламлары» жаш тёлю къымылдаугъа да тири къатышханды.
Аны мураты уа лингвистика жаны бла билим алыргъады. Дагъыда француз, тюрк тиллеге да тынгылы тюшюнюр акъылдады. Бюгюннгю жашауда тыш къыраллы тиллени иги билген адамны тамблагъы кюннге ышаныуу бютюн кючлю болуруна, ол бир заманда да ишсиз къалмазына да ийнанады.
Мокъаланы Зухура.
