18 января, 2025 - 09:15

Жашларыбыз бла къызларыбыз, бирсиледен артха къалмай, окъууда-билимде, иш юсюнде да жетишимли болсала, аланы юйретгенлени эмда ёсдюргенлени да хурметлеригинг келеди. Нек дегенде, халкъда айтылыучусуча, жалан жерде ханс да ёсмейди.
Кёп болмай а биз Мокъаланы Расулну къызы Амираны «Жылны студенти-2024» даражагъа чыкъгъанына барыбыз да къууаннганбыз эмда кёлюбюз кётюрюлгенди. Эм алгъа аны мектепде окъугъан жылларына къайтсакъ, ол ары алты жылы да толмагъанлай жюрюп башлагъанды. Алай эсе да, тенгчиклеринден артха къалмай, юлгюлю болуп, жаланда «бешлеге» окъугъанды.
Школда окъугъан кезиуюнде уа Амира «Артек» лагерьге юч кере баргъанды. Ары уа сабийле окъууда-билимде жетишимлери ючюн тюшгенлерин барыбыз да билебиз. Биринчи кере къызчыкъны лагерьге КъМР-ни Жарыкъландырыу эмда илму министерствосу дерс олимпиадалада, эришиуледе ахшы эсеплери ючюн ийген эди. Андан арысында уа ол кеси алгъан грамоталары эмда дипломлары бла онлайн халда эришиулеге къатышып, «Артекге» барыргъа эркинликни алай бла хорлап тургъанды.
Ол дагъыда «Живая классика» Битеуроссей конкурсха аслам кере къатышып, Черек районда биринчи жерге да тийишли бола келгенди. «Сабий эмда жаш тёлю китапны ыйыгъында» уа аны «Ата журтну, кишиликни, махтаулукъну юсюнден» деген кесегинде къара сёз бла жазылгъан чыгъарманы кёлюнден окъуп, районда, республикада да биринчи болгъанды эмда КъМР-ни Маданият министерствосуну диплому бла саугъаланнганды.
«Синяя птица Гжели» атлы халкъла аралы сабий, жаш тёлю эмда студент фестивальгъа да къатышып, анда да алчыланы тизмесинде болгъанды. Аны дерс олимпиадалада жетишимлерин санап чыгъарча да тюйюлдю. Малкъар тилден бла адабиятдан, географиядан, технологиядан, бирси предметледен да дайым да биринчи болгъанлай, окъугъан мектебини, юйретген устазларыны да даражаларын кётюргенлей тургъанды.
Школну алтын майдалгъа бошагъанындан сора да, Батчаланы Роза атлы диплом бла саугъаланнганды. Мында ол тёре эрттеден тохташдырылып, мектепни тауусхан сабийледен жетишимлери бла айырмалы ючеуленнге бериледи аллай диплом. Аланы уа кимле боллукъларын устазла кеслерини жыйылыуларында жашырын къол кётюрюу амал бла тохташдырадыла.
Алай бла бюгюнлюкде Амира Пятигорск шахарны къырал университетини халкъла аралы байламлыкъла институтуну «халкъла аралы къоркъуусузлукъ» факультетини «Къытай» ызында бакалавриатыны тёртюнчю курсундады. Ары уа Бир къырал экзаменлерини барысын да токъсан чакълы бир баллагъа берип, алай кирген эди. Сагъынылгъан факультетни тиллеге, аланы жюрютген халкъланы маданиятларына, адет-тёрелерине эмда жашау турмушларына сейири бла киргенди.
Тау элни мектебинде уа ол немис тилни дерслерине жюрюгенди. Алай а, институтда анга ингилизча окъургъа тюшюп, бу тилге алгъадан да юйреннгенлени къатларында къыйналыргъа тюшген эсе да, интернетде болгъан амалланы да хайырланып, кеси кесин тюшюндюрюп, бу жаны бла да алчыланы санына къошулгъанды. Аны алайлыгъын а таулу къызны окъуу юй Къытайгъа билимлерин ёсдюрюрге жиберген алты студентни санына къошхан шарты да шагъатлыкъ этеди.
Алай бла Амира студент тенглери бла бирге Къыбыла Къытайны Гуанчжоу шахарыны къырал университетине окъуу юйлени араларында байламлыкъ жюрютюу жаны бла къырал программалагъа тийишлиликде тюшгенди. Анда уа алагъа къытай тилни ингилизча айтып юйрете эдиле да, студентлени кеслерине тынчыракъ неда къыйыныракъ къауумладан сайлау этерге эркинлик да бар эди. Мокъаланы къызлары уа тынчыракъ бёлюмню айырып, эм алгъа дерсге алай барады. Болсада билимин эслеп, устаз анга биринчи дерсде окъуна: «Санга мында эригиулю боллукъду. Бирси, къыйыныракъ къауумлагъа кёчсенг, анда билиминги хайырланнган, айнытхан да эталлыкъса», - деп юйретеди.
Гуанчжоуда ала хар ыйыкъдан да къытай тилни къалай билгенлеринден бла иероглифлени жазыудан сынаула бергендиле. Мында да таулу къызны хунери эсленмей къалмагъанды. Иероглифлени къытайлыланы кеслеринден да ариу жазаса, деп тургъандыла анга. Сёлешиу тили да айный барады. Нек дегенде къытайча жазылгъан чыгъармаланы окъугъанлай турады.
Амира аны хунерин эслеп, анга бютюнда айныргъа онг берген устазгъа ыразыды. Къытайлыланы къонакъбайлыкъларын, аланы адамгъа къайгъырыу ышанларын жаратханды. Андан а шагъатлыкъ къагъыт бла къайтханды. Пятигорскга келгенинде уа ыйыкъны ичинде 24 сынауну жетишимли бергенди.
Кертиди, къайсы жаш адамныча, аны ахшы муратлары алдадыла, ала аны талпындыргъан да этедиле. Энди уа ол бакалавриатны бошап, «Къытай» ызда магистратурагъа кирир акъылдады. Мураты толса, билимин Къытайны шахарларындан биринде ёсдюрлюкдю.