13 января, 2025 - 09:40
Зэщхьэгъусэхэу Чыржын Аслъэнрэ Джатэжьей Люсенэрэ зэрыджэгу гуащэ ящIащ, Кавказ Ищхъэрэм и лъэпкъыбзэу 8-кIэ таурыхъхэмрэ усэхэмрэ жиIэу.
Апхуэдэ хьэпшып къыдагъэкIыным ахэр щегупсысар япхъу цIыкIу Амелие къащыхэхъуарщ. Зэщхьэгъусэхэр хущIокъу езыхэр къызыхэкIа лъэпкъ щэнхабзэм я хъыджэбз цIыкIур щIапIыкIыну, уеблэмэ абы щхьэкIэ унагъуэр Москва къикIыжри, республикэм къэIэпхъуэжащ.
Люсенэ ирогузавэ иджырей гаджетхэмрэ мультфильмхэмрэ сабийм я анэдэлъхубзэр зэрыIэщIагъэхум, къалэдэс щIалэгъуалэм ар хамэ къэралыбзэ хуэдэу зэраджым. «Дэ дыщысабийм апхуэдэ гугъуехьхэр диIакъым. Сэ Щхьэлыкъуэ къуажэ сыкъыщыхъуащ. Илъэситху сыхъухуи, урысыбзэкIэ сыпсэлъакъым. Си анэдэлъхубзэр фIы дыдэу сщIэуэ сыкъэхъуащ», - жеIэ Люсенэ. ЦIыхубзыр дохутыр-онкологщ, академик Павлов И. П. и цIэр зезыхьэ Санкт-Петербург медицинэ институтым щеджащ.
Гуащэр нэгъуэщI зезыгъэужь хьэпшыпым къытращIыкIащ, абы и кIуэцIым илъ плеерым жиIэну ирагъэтха псалъэхэр къегъэIу. Абы и теплъэмрэ и лэжьэкIэмрэ зэхэзыгъэувар Аслъэнщ, щIалэр IT-м и IэщIагъэлIщ. «Мадинэ» зыфIаща гуащэм бостей плъыжь щатIэгъащ, «къыджиIэж» псысэхэмрэ усэхэмрэ къыхэхынымкIэ дэIэпыкъуэгъу къахуэхъуащ лъахэхутэхэмрэ школ егъэджакIуэхэмрэ. Дакъикъэ 40 къызэщIеубыдэ гуащэм «трагъэтха» псысэхэм, усэхэмрэ псынщIэрыпсалъэхэмрэ.
Адыгэбзэрэ балъкъэрыбзэкIэ ахэр «къэзыгъэIур» КъБР-м щIыхь зиIэ и артисткэхэу КIэхумахуэ ФатIимэрэ Мамаевэ ФатIимэрэщ. Апхуэдэуи абы трагъэтхащ осетин, шэшэн, авар, лезгин, къумыкъу, даргин бзэхэмкIэ. Ахэр зэхуихьэсын щхьэкIэ Аслъэн кIуэн хуей хъуащ гъунэгъу республикэхэм. ЩIыналъэхэм я театрхэмрэ макъыр щрагъэтх студиехэмрэ захуигъэзати, дэнэкIи и Iуэхур къыщыдаIыгъащ.
Гуащэхэр къыдэзыгъэкIар китай IуэхущIапIэщ, тыкуэнхэм къызэрытралъхьэуи, щIэупщIэ игъуэтауэ зэбграх. Гуащэр щхьэпэщ псом хуэмыдэу илъэсищ-плIы хъу цIыкIухэм папщIэ. АнэдэлъхубзэкIэ псысэхэм уи сабийр жэщым щIэбгъэжеикIыжыныр сыт и уасэ!
Багъэтыр Бэллэ.
