20 октября, 2021 - 11:19
Не заманда да устазланы аты уллу хурмет бла, сый бла айтылады. Школну босагъасындан биринчи атлам этгенден башлап, аны бошап, уллу жашаугъа кетсек да, устазларыбызны эсибизден кетермейбиз. Бюгюн арабызда болмагъанла, жашаудан кетгенле да дайым жюрегибизде турадыла.
Сарбашланы Фазика Киштикланы Солтанмуратны къызы да школда аны окъутуп тургъан устазларын бек сюеди, алагъа уллу хурмет да береди, бир къауумлары бла уа шендю кеси школда ишлейди. Фазика Огъары Малкъар элни 1-чи номерли орта школунда башланнган классланы устазыды, экинчи классны окъутады. Сабийле бла билимин, кючюн, заманын да аямай, кюрешеди. Ол окъутхан сабийле билим алыргъа, хар тюрлю затны да билирге да бек итинедиле, бир да болмагъанча эсли сабийледиле. Окъуй, жаза, санай да биледиле. Устаз а къуру билим берип къоймай, аланы намыслы, адепли, уллугъа хурмет эте билирге юйретеди. Сабийле да Солтанмуратны къызы Фазиканы айтханын да иги этедиле, кесин да бек сюедиле. Ала алдай билмейдиле, жюреклери тазады, ачыкъды.
Башда айтылгъан школгъа устаз болуп ишлерге Сарбашланы Фазика 2009-чу жылда къолунда къызыл диплому бла Къарачай-Черкес къырал университетни бошагъандан сора келген эди. Биринчи кюнден окъуна сабийле бла бир тилли болуп, къыйын ишге келю бла берилген эди. Андан бери ишине уллу келлю болмай, битеу кючюн, билимин да салып кюрешеди.
«Ишими, сабийлени, коллективни да бек сюеме. Мында эрттеден ишлеген, кеп сынаулары болгъан устазла бардыла, ала ишлери, сезлери бла да менича жаш устазлагъа дайым болушханлай турадыла, бек сау болсунла», - дейди Фазика.
Кесинг да тутхан ишингден, жашауунгдан да къууан, Фазика!
