9 августа, 2022 - 15:32
Хапар
Кече арасында, сагъат бир бола-болмаз, Къушжетерни бир иги шуёху Илячин телефон бла сёлешди. Къушжетер «алло» дегинчи Илячин:
- Мен къатын алгъанма! - деп, къычыргъаны бла аны къулагъын зынгырдата, жукъусундан терк аяздырып, къууанч хапарын билдирди.
- Тапханса чам этер заман. Кеч болгъанды – жат да жукъла, - деп, Къушжетер телефонну чолпусун атды.
Телефон жангыдан сёлешди:
- Нек этесе быллайла, ийнанмаймыса? Мен сени къачан алдагъанма?
- Аны манга алгъаракъдан айтсанг а, - деп, Къушжетер биягъы телефонну чолпусун жерине салды.
Телефон олсагъат зынгырдады:
- Не болгъанды санга, кертда дегеннге? Сен эдинг да къоймагъан: «Къатын ал, къатын ал», - деп, башымы суугъа атарыкъ этген. Алгъаныма, ийнанмаймыса, ийнанмаз от ашагъын? Бусагъат такси тутуп, элтип кёргюзтейим. Ийнаныр эсенг а. Кёрмейсе аны, - деп, Илячин да, къууанчын унутуп, бир кесек ачыулу болду.
- Башымамы урама, кесими къатынымдан да къачалмай айланама. Къоялмай дегенлигим.
- Не болуп къалгъанды? Тап тура эдигиз да…
- Не болгъанын кесинг иги билесе. Айтхан эдим да ол кюн.
- Арагъыз бла къара киштикми ётген болур, сора?
- Ала, къара эсе да билмейме. Отоуу – башха, отоуум – башха. Насыра Хожа: «Къатын алсанг да сокъуранырса, алмасанг да сокъуранырса. Алып сокъуран», - дегенди. Алайды да, мен алып сокъураннганладанма, - деди Къушжетер. – Сюймеклик жокъ кёреме дунияда.
- Алай айтып мени къоркъутма, шуёхум. Кимде бар, кимде жокъ, - деп, Илячин чам этерге кюрешди.
- Бирде бар, бирде жокъ.
- Кимни алгъанса деп да сормайса. Санга башхасы жокъмуду шуёхунг кимни келтиргени: башы тюзмюдю, тюйюлмюдю, ариумуду, эришимиди, жюреги тазамыды, азамыды, базамыды, жазамыды, къазамыды…
- Болду, болду андан ары къазма. Сени башынг, жюрегинг тазады да, анга базынама.
- Биле эсенг ким болгъанын? Айтчы бир, Къушжетер?
- Кесинг айт да къой. Къайсы бирин санайым. Мындан кёпге созма да, Илячин. Жукъум келгенден, кёзлерим къысылып барадыла. Тангны атдыраса. Аты къалайды?
- Бёдене.
- Бёденеми?!
- Хау, Бёдене.
- Ол, ышарса, уууртчукъларында чунгурчукълары болгъан? Кёзлери кечеги дугъумлача?
- Хау, хау. Бек тюз ангылагъанса. Тамам кесиди.
- Оллахий де! Къачан, не заманда?
- Оллахий-билляхий, ма бусагъатда!
- Шуёхум, мен бусагъат… Эшитемисе… Ангылаймыса… Мен бусагъат такси алып жетеме, Илячин!.. - деп, Къушжетер чолпуну бир жанына быргъап, кечеге атлады.
