19 января, 2025 - 09:27
Бусагъатда энчи аскер операциягъа къатыша тургъан быллымчы жаш Ёзденланы Таубий къыралны аллында борчун толтурууну тюзге, магъаналыгъа санайды. Аны анасы Ёзденланы Женя жашыны бу оноууна къалай къарагъанларыны юсюнден сорууларыбызгъа жууаплагъанды.
- Женя, жашынг аскерде къуллукъ этерге кетип, андан а энчи аскер операциягъа къатышыргъа сюйгенди. Сен не айтханса аны ол оноууна?
- Школну бошап Нальчикни жол-транспорт колледжинде окъуй тургъанлай, аскерде къуллукъ этерге сюеме деп, кесини ыразылыгъы бла кетген эди. Юч айдан сора жашаууму аскер бла байламлы этеригим келеди, аны себепли контракт жазаргъа сюеме деп билдирди. Барма деп да кюрешдим, болсада инсан сезимин бузаргъа сюймедим, умутларын кесмедим.
Къайсы ёмюрде да бола келгендиле урушла, къазауатла да. Кишилик аллай кезиуледе сыналгъанды. Тилегим сакъласын деп ыразылыгъымы бердим.
- Алыкъа жыл саны жашды, къоркъгъан деген сезими болгъанмыды?
- Жаланда 18 жылы бола эди аскерге кетгенинде. Элде туууп ёсген жашха биринчи заманында къыйыныракъ да тюшген болур эди, жангы жорукълагъа тийишип жашаргъа. Къоркъама деп бир заманда да айтмагъанды, билдирмегенди къыйналса да. Сабийлигинден да алай эди.
Школда окъугъан заманында адабиятны дерслеринде Ата журтуна, Туугъан жерине, эллине да сюймеклигин кёлден жазмаларында аламат суратлай билгенди. Жюрегинде бу сезим болмаса, аны алай хазна суратласын.
- Жангыз жашынгы къазауатха ашыргъанда жюрегинги къаллай сезимле бийлей эдиле?
- Хар ананыча, жюрегимде къоркъуу да болгъанды. Болсада ёхтемленеме, кеси ыразылыгъы, сабий акъылы бла сагъыш этип къыралгъа къуллукъ этерге итиннгенине. Ким болса да этерге керекди бу ишни, мен да артха турургъа сюймейме, дейди. Хар ананы да ненча сабийи болса да, ала анга эм багъалыдыла, хар бирини кесини жери барды ананы жюрегинде. Бизни юйюрде чыгъармачылыкъгъа уллу эс бурулгъанды не заманда да. Окъугъан китапларындан жигитле анга аламат юлгю болгъан сунама.
- Сени бла хапарлашханда не айтады? Неге ийнанады?
- Хапар айтырча онгу артыкъ кёп болмайды. Алгъаракъда бир ушакъ этген кезиуюбюзде айтхан сёзлери эсимдедиле, белгили тюрк поэт Назым Хикметни сёзлерин келтирип: «Мен жанмасам, сен жанмасанг, биз жанмасакъ – ким чачар къарангыны», - деген эди. Тюзлюк хорларыгъына ийнанады, жер юсюнде мамыр жашау болур ючюн кючюмю аярыкъ тюйюлме, дейди. Мен аны быллай оюмларына бек къууанама. Не заманда да юйюне, юйюрюне да былай жууаплы боллукъ сунама.
- Къыйналгъан затлары бармыды?
- Тынч болмаз юйюнден, жеринден айырылып, кюн сайын ёлюмню кёзюне къарап тургъан, алай а хазна билдирмейди къыйналгъанын.
- Терен патриот сезими болгъан жашыбыз бла биз да ёхтемленебиз. Контракты къаллай биргеди? Къачан келир муратдады?
- Контракты келир жылны октябринде тауусуллукъду. Андан ары да аскерде къалыргъа мураты барды. Июньда солуугъа иерик болурла деп ышанып турабыз. Ашыгъып, тансыкълап сакълайбыз. Бизни таныгъанла, тийрем, жууукъларым бла тенглерим мени бла бирге жарсыйдыла. Эрикмей сёлешип, хапар алгъанлай турадыла, алагъа бек ыразыма, сау болсунла.
- Къууанч бла жыйылсын! Анда къуллукъ этгенлеге не айтыргъа сюесиз?
- Сау бол. Жашлагъа тилегим: тёзюмлю болсунла, тенгликни багъалай билсинле. Къазауат тохтап, сау-саламат хорлам бла хар жаш да анасыны къолуна жыйылсын.
ТЕМУККУЛАНЫ Асият.
