6 февраля, 2024 - 12:43
Жаш адамларыбыз, къайры барсала да, къайсы усталыкъны сайласала да, атларын иги бла айтдырып, жетишимли болуп, ёхтемлендиредиле. Кёнделенде туууп, жырын да анда айтып, бюгюн а къыралыбызны ара шахарында Москва областьны А.Д. Кожевников атлы къырал академияда жырлап тургъан Атмырзаланы Сапарны къызы Танзиля аллай къызларыбыздан бириди.
Ол сабийлей жырлап башлагъанды. Школну ишине тири къатышхан, тюрлю-тюрлю эришиуледе алчы жерлеге чыкъгъан булбул ауазлы къызчыкъгъа ким да сюйюп тынгылагъанды. Школчу къызчыкъ анда «Таулан» ансамбльни къауумунда жырлагъан эди. Андан бери иги кесек заман озгъанды. Бюгюн ол жарыкъ бетли, нюрлю къызчыкъ, жыр айтыу усталыкъны тасхаларына тюшюнюп, фахмусуна таматаланы эслерин окъуна бурдургъанды.
Жырчыла хазырлагъан аламат устаз барды. Россейни сыйлы артисткасы Таукенланы Малкъарбийни къызы Галина, сау болсун, ариу ыз ызлап жашау узуну, сахнагъа кёплени чыгъаргъанды. Ол санда Къабардокъланы Зухураны, Габуланы Зухураны, Жуболаны Жамболатны, Мызыланы Аубекирни эм башхаланы. Атмырзаланы Танзиляны бир концертде кёргенди Галина Малкъарбиевна. Анда тынгылап, ол сабий къызчыкъны къадары жыр бла байламлы боллугъун ангылагъанды. Ол жаны бла окъургъа да кёллендиргенди.
Айхай да, музыка школну бошамагъан жашлагъа бла къызлагъа маданият жарыкъландырыу колледжде окъугъан тынч тюйюлдю. Ноталаны билип, алай келирге керекдиле ары сабийле. Танзиляны аллай хазырлыгъы болмай тургъанлай алгъандыла ары, табийгъат берген фахмусуна жол ача.
Анда окъугъан жыллада салгъанды сахнагъа бир заманда ханс басмаз жолун Танзиля. Бир тюрлю бир эришиу, не концерт болуп, аны программасына кирмей къалмагъанды. Дагъыда Танзиляны мен элли къызыбыз Хабланы (Бачиланы) Мариямны концертинде жырлап кёргенме. Жыр айтама дегенде, Танзиля кеси сайлагъанны, жюрегине жетгенни сайлагъанын да эслегенме.
Жарсыугъа, жырчыларыбызны кёбюсю окъууларын жарты къоядыла, кеслерине базыннганданмы огъесе башха сылтаула чыгъыпмы. Алай а халкъ жырчыланы билимлерине академиялы жыр айтыу къошулса, ала къалай бай боллукъларына эс бурмайдыла.
Насыпха, Танзилягъа аллай онг чыкъгъанды. Ол Москвада Хор санатны В.С. Попов атлы академиясына кирирге таукел болгъанды. Аны сайлай туруп, сёзсюз, андагъы устазланы даражаларына, жыр айтыуну не жаны бла билим алыргъа боллугъуна да эс бургъанды. Аны юсюне бу бийик билим берген окъуу юйде аны къыралдан тышында окъуна уллу сахналагъа чыгъып жыр айтыргъа, концерт программалагъа, сахна оюнлагъа къошулургъа да онгу боллугъун билгенди. Алай бла ол бу окъуу юйню музыка эм театр искусство бёлюмюне киргенди. Анда аны баш устазы Ирина Глаголева болгъанды.
Ирина Анатольевна итальян эм француз тилден дерсле береди, гуманитар, социал-экономика кафедрада ишлейди. Ма алай, тилни бла музыканы бир этген, ауазны физиология къурамын тинтген устазны къолуна тюшгенди Танзиля. Ол бла энчи устазы Светлана Нестеренко аны жыр айтыуну кёп тасхаларына юйретгендиле. Быллай ишде керек таукелликге, арымай-талмай ишлерге да тюзетгендиле. Ол андан солист, педагог, артист деген усталыкъла бла чыкъгъанды.
Уллу хорда жырлагъан эслерча жетишим болгъаны сёзсюздю. Бюгюн таулу къызны ара шахарда аллай ишге тохтагъаны, аны академия жыр айтыууна тынгыларгъа сюйюп, аны тыш къыраллагъа да чакъыргъанлары иги шартладыла. Ала халкъыбызда фахмула таркъаймагъанларын кёргюзтедиле. Кёнделенчи къыз кёп тыш къыраллада да болгъанды. Ол жерледе Танзиляны кеси тынгылаучулары барды. Ол кёп тюрлю халкъла аралы эм россей конкурсланы лауреатыды. Хар сахнагъа чыкъгъаны сайын эсинде бир зат болады – ол эстрада жырмыды, операдан ариямыды, аны сёзлерин, макъамын да жазгъан адамла ары салгъан къыйматны къаллай бир болалса да, аллай бир терен кёргюзтюу. Дагъыда Танзиля жаш жырчыланы да юйретеди.
Академия жыр айтыу бла бирге эстрада жырла да айтады къызыбыз. Ана тилде Танзиля «Тау элимде той», «Кюн бла ай», «Жюрегимде жашайдыла тауларым», «Исламей», «Менсиз къалай жашайса?», «Сюймеклик ийман», «Малкъарым»… «Жюрегимде жашайдыла тауларым» деген ат бла жырчы къыз жыр альбом да къурагъанды. Мында концертге чакъырылса, бир жыр айтыр ючюн окъуна ол, учуп, Москвадан бери келеди. Къалай жырлаучусун а билесиз.
Кёнделенде Маданият юйню директору, «Таулан» ансамбльни мурдорун салгъанладан бири Батырбийланы Махти: «Танзиляны жетишимлерине биз бютюнда бек къууанабыз, - дейди. – Нек дегенде ол биринчи атламларын бизде этгенди. «Тауланда» да, школда да ишлеген Гергъокъланы Азрет-Алий келтирген эди аны сабийлей, энчи юйретирге излеп». Бюгюн Танзиля жаланда элибизни угъай, республиканы да атын айтдырады Москвада, башха жерледе да.