30 января, 2024 - 15:32
Мечиланы Кязим атлы фондда Сергей Еремеевни «Ёз жерими бешиги» деген китабыны презентациясы болгъанды. Тюбешиуню «Къайсыннга жюз атлам» фонд бла Мечиланы Кязим атлы фонд бирлешип къурагъандыла.
Презентация башхалагъа ушамагъанды, бошалгъанындан сора да, адамла кеталмай кёп тургъандыла. Нек? Жазыучу Сергей Еремеев бизни халкъыбызгъа, жерибизге да сюймеклиги бла хар бирибизни уятханды, кеси кесибизге башха кёзден къаратханды. Сагъыш этигиз: подполковник Еремеев малкъар тилге юйренип, назмула жазып башлагъанды. Еремеевни «Ёз жерими бешиги» деген китабы орус тилде жазылса да, хар тизгининде – Малкъаргъа сюймеклик!
Кесибизни арабыздан кёп адаммы табыллыкъды тауда къошха барып жашаргъа сюйген – миллетни жашау турмушун, малчылыкъны тынчлыгъын-къыйынлыгъын ангыларча? Ачыкъ айтайыкъ: кёп адам табыллыкъ тюйюлдю. Оруслу жаш, туристча, тауланы ариулукъларына сейирсиннгени бла чекленмей, таулу къошлагъа барып, анда хар затны да тинтгенди, билгенди. Ол къаллай кёллендирирча шартды!
Презентациягъа келген къойчу Гадийланы Элиясны юсюнден Сергей Еремеев: «Керти адам, иги адам», - дегенинде, кёлюм окъуна толгъан эди. Къонакъ Элиясны къонакъбайлыгъын, таза ниетин кёргени, анга аны бийик багъа бергени, жюрек ыразылыгъын билдиргени бир хычыуун кёрюннген эди.
«Къайсыннга жюз атлам» фондну башчысы Тетууланы Хадис презентацияда былай айтханды: «Мен Сергей Еремеев бла соцсетьледе танышханма. Бек фахмулу, огъурлу адамды, таулу жашла бла бирге Минги таугъа да чыкъгъанды, анда Къулийланы Къайсынны, Отарланы Керимни назмуларын окъугъанды. «Малкъарны жарыгъы» деген биринчи китабы 2018 жылда басмаланнганды, ызы бла Уллу Ата журт урушну жигитини юсюнден «Шурка Денисов» деген чыгъармасы бла окъуучуланы къууандыргъанды, ючюнчю китабы белгили альпинист Ёлмезланы Абдулхалимге аталгъанды, «Ёз жерими бешиги» уа тёртюнчю китабыды. Сергей Еремеев аскерчиди, СВО-гъа къатышханды, Кишиликни ордени эм Суворов атлы майдал бла саугъаланнганды. «Къайсыннга жюз атлам» фонд Сергей Еремеевни малкъар халкъны маданиятын айнытыугъа уллу къыйын салгъаны ючюн «Жамауатны хурмети – Малкъарны инсаны» деген атха тийишли кёргенди.
Еремеев аскерде, къазауатда да чынтты командир болгъанына аны бойсунууунда къуллукъ бардыргъан жашла Къалабекланы Алим бла Гидийланы Расул шагъатлыкъ этгендиле.
Владимир Вороков атлы маданият фондну таматасы Люаза Макоева: «Сау болугъуз, солдатланы сакълап, саулай аналарына къайтаргъаныгъыз ючюн, - дегенди. – Малкъар тилге юйреннгенигиз кёплени кёллендирликди».
«Уста» фондну башчысы Бачиланы Хамзат да Еремеев уста командир болгъандан сора да, солдатланы къайгъыларын, къууанчларын да кесиникича кёргени ючюн ыспас этгенди.
«Минги-Тау» журналны баш редактору Додуланы Аскер Россейни Лермонтов атлы комитетини Къайсынны юбилейине аталгъан «Хорламны солдатлары» деген майдалы бла саугъалагъанды Еремеевни. «Балкария» тепсеу ансамбльни биринчи къауумунда тепсеген Атабийланы Лидия атасы Магометни назмуларын окъугъанды эм аны китабын саугъалагъанды Сергей Владимировичге.
Полковник Аталаны Жашарбек да, белгилисича, назмула жазады. Ол: «Алан, мени окъуна жокъду аллай бир назмум Минги тауну юсюнден!» - дегенди, ышарып, сора кесини назмуларын окъугъанды, запасдагъы офицерлени биригиуюню белгисин Еремеевге саугъалагъанды.
«Заман» газетни баш редакторуну орунбасары Жангуразланы Нажабат китапха ал сёз жазгъанды эм редактору болгъанды. Нажабат бу фахмулу адамны шуёхлукъ жюрюте билгенин, кертичилик аны къанында болгъанын чертгенди. Китапны басмагъа чыгъаргъа болушхан «Заман» газетни жууаплы секретарыны орунбасары Кетенчиланы Зульфия да иш бек терк, женгил баргъанын айтып, Сергейни жангы китабы бла алгъышлагъанды.
Жуболаны Джамбулат «Сокол Балтики» деген назмугъа макъам жазып, ингирде жырлагъанды. Бу чыгъарма Къабарты-Малкъарда «Совет Союзну Жигити» деген атха биринчи тийишли болгъан Байсолтанланы Алимге аталгъанды. Дагъыда Ташлы-Таладан байрамгъа келген «Ийнар» ансамбль Сергейни сёзлерине «Мени сюймеклигим – Малкъар» деген жырны саугъалагъандыла жыйылгъанлагъа, ол а премьера эди! Гузиланы Тахир бла Байсыланы Элдар «Ляйсан» трио бла – Уазикланы Аида, Сараккуланы Марьяна, Токумаланы Зухура – аламат жангы жырны къошхандыла репертуарларына.
Сергей Еремеев Малкъарда бек жууукъ адамларын тапханы сейир тюйюлмюдю! Минги тауда жазыучу бла бирге болгъан Гуртуланы Аслан, Сарбашланы Камал, Боллуланы Аслан тенглерин жетишимлери бла ачыкъ жюрекден алгъышлагъандыла.
Мечиланы Кязим атлы фондну таматасы Аппайланы Лариса: «Фонд ачылгъанлы, битеу мында бардырылгъан ишле бир тап озадыла, адамла мында бир бирлерин тансыкълайдыла», - дегенди. Кязимни бла Къайсынны фондлары, кертиси бла да, бир жомакълы ингир къурагъан эдиле.