13 июня, 2023 - 13:59
Сириядан келип, республикабызда кёп жаш адам окъуйду эмда ишлейди. Мени бюгюннгю ушакъ нёгерим да Дамаскдан келген Гогуланы Нарзанды. Болсада ол араплыланы адетлери бла атасыны, аппасыны да атларын жюрюте, Абидин Алий Нарзан Мусса болгъанын айтханды.
- Аппам къарачайлы Гогуланы Абидинни жашы Алий, Дамаскга патчах Россейни заманында, революциягъа дери кетгенди, - деп башлагъанды ол хапарын. – Анда Абайланы Алибекни къызы Хадижат бла юйюр къурайды. Алагъа жашчыкъ да тууады – мени атам Мусса. Ол ингилиз, арап, малкъар, орус тилледе уста сёлешгенди. Кеси да араплы къызны алгъанды.
Сирияда уруш башланнгандан сора, юйюрюбюз Тюркге кёчгенди. Атам мектепде да бек иги окъугъанды. Аскер усталыкъны алып, сириялы аскерледе кёп жылланы къуллукъ этгенди. Офицер чында бошагъанды къуллугъун. Бусагъатда пенсиядады. Анга жетмиш жыл болады.
2011 жылда Сирияда уруш башланнганда, мен университетни тёртюнчю курсунда экономист усталыкъгъа окъуй, аны бла бирге «Адыгъэ хасэ» жамауат организацияда сабийлени математикадан окъута эдим. Жангыз жаш болгъаным себепли, атам, анам да жанымы сакълар муратда жамауат организацияны болушлугъу бла Россейге, Къабарты-Малкъаргъа, ашырадыла. Эки жылны ичинде орус тилге да юйренип, Къабарты-Малкъар къырал университетни экономика бёлюмюнде окъуууму андан ары бардыра турама.
Сёзсюз, тынч тюйюлдю. Атамдан бла анамдан ахча жиберигиз деп, тилеп турургъа болмайма. Кюндюз окъуп, тюшден сора уа къурулушда урунама. Нёгерлеримден бирини айтханы бла аграр университетге кёчеме. Спортну да къоймайма. Футбол ойнаргъа гитчелигимден да сюйгенме. Мен атамы, анамы, эгечлерими кёрмегенли он жыл болады. Телефон бла сёлешебиз, хапар билебиз. Атама, анама барлыгъым бек келеди, алай документлерими урлатханма да, кетер онгум болмай тургъанды. Танышларымы болушлукълары бла миграция службада ишлеген Биттирланы Ханифагъа тюбейме, ол къолундан келгенни этерге айтады. Къысха заманны ичинде, паспортну да къолума алама. Сизден тилеригим, газетни юсю бла ол огъурлу тиширыугъа уллу ыспас этгеними бир билдирсегиз эди», - деп бошагъанды хапарын сириячы таулу жаш.
Нарзанны малкъарлы, къарачайлы жууукълары да бардыла. Ол аланы табаргъа бек ыразы эди. Атасыны жаш заманында суратын да бергенди. «Атамы журтуна келгенимден ары жууукъланы, ахлуланы тапсам, танысам, бек сюерик эдим», - дейди. Газетде аны хапарын басмалагъаныбыздан сора, аны окъуп, эс бурлукъла табылырла деп бек ышанабыз.
Бу кюнледе уа, Нарзан да билмей тургъанлай, Тюркден эгечи Сидра келгенди.